İşıgın Toxumu

“İşığın Toxumu” Ölçü: 50 × 70 sm Texnika: Akril + Fosfor boya İkili xarakter: Gündüz və gecə görünümü Əsərin Təsviri Bu əsər insanın zahiri bədənindən çıxaraq ,batini azadlığa və kamilliyə ucalışını təsvir edir. Tablonun mərkəzində, beyindən cücərən bir fidan və işıqdan ibarət insan fiquru boy atır. Bu fiqur insanın maddi aləmdən çıxaraq ruhani azadlığa, Kamilliyə yüksəlişini simvolizə edir. Əsər gün işığında toxumun cücərməsi və işıq varlığı ilə insanın rasional düşüncəsini, gecə isə fosfor boyanın işıltısı ilə ruhun gizli enerjilərini və ezoterik yüksəlişini göstərir. Beləcə əsər ikili təbiətə malikdir – bir tərəfi şüura, digər tərəfi isə ruha xidmət edir. Simvollar və Anlamlar Beyin üzərində Fidan : Hər şeyin başlanğıcının düşüncədən doğulduğunu, insan zehninin həm məhdudiyyət, həm də potensial daşıdığını göstərir. İşıqlı fiqur: Ruhun bədəni aşaraq azadlığa çıxması, daxili mənəviyyatın yüksəlişi. Toxumdan cücərən bitki: Həyatın və ruhun tükənməz inkişaf gücü. Kosmik fon: "Makro və Mikro Kosmos"anlayışı.Biz bu kainatın içindəyik - Kainatda bizim içimizdədir . İ.Nəsimi: "Məndə sığar iki cahan,mən bu cahana sığmazam" İnsan ruhunun kainatla birliyini və sonsuzluğu simvolizə edir. 11:11 rəqəmi: Əsərin bitmə saatı həm də numerlogiyada Ruhani aləmdə oyanış saatı kimi xarakterizə edilir. Bu rəqəmlərin tabloda yer alması təsadüfi deyil . Fosforlu işıq (gecə görünümü): Ruhun qaranlıqdan işığa keçidini, gizli qatların üzə çıxmasını təmsil edir. Fəlsəfi və Ezoterik Yanaşma Bu tablo sadəcə vizual bir rəsmdən ibarət deyil. O, insanın dünyəvi beş duyğu orqanlarının yaratdığı məhdudiyyətlərdən azad olub altıncı hiss — intuisiya və ruhani idrakla ucalmasını təcəssüm etdirir. Gün işığında beyin və düşüncənin maddi gücü ön plana çıxır, gecə isə fosforlu işıqlar vasitəsilə tamaşaçı ruhun əbədiliyinə və mistik enerjilərə şahid olur. Əsər həm rasionallığı, həm də mistikanı birləşdirərək ikili varlığımızı – həm maddi, həm də mənəvi tərəflərimizi göstərir.