Zəhra Qafarova (d. 20 aprel 2011) Bakı şəhərində yaşayır və təhsilini British School in Baku-də, ingilis bölməsində davam etdirir. Üç dildə — Azərbaycan, ingilis və rus dillərində sərbəst ünsiyyət qurur. Zəhra rəsmə 5 yaşından etibarən maraq göstərmiş, 7 yaşından isə peşəkar müəllimlə sistemli şəkildə məşğul olmağa başlamışdır. Onun yaradıcılığı erkən yaşlarda formalaşan vizual təfəkkür və intuitiv ifadə ehtiyacının nəticəsi kimi diqqət çəkir. Əsərlərində milli motivlərlə şəxsi daxili dünyasının sintezi müşahidə olunur; rəng və forma vasitəsilə emosional vəziyyətləri birbaşa və filtrasiyasız şəkildə ötürür. Bu yanaşma, həm spontanlıq, həm də artıq formalaşmaqda olan fərdi vizual dil arasında maraqlı balans yaradır. Rəssamın təqdim olunan kolleksiyası təxminən 50-yə yaxın rəngkarlıq və qrafika, eləcə də 20-dən çox rəqəmsal əsəri əhatə edir. Bu işlər müxtəlif texniki yanaşmalarla yanaşı, fərqli psixoloji və vizual vəziyyətlərin ardıcıl müşahidəsi kimi oxunur.