Səmiyə Həsənova (11.07.2007) – gənc rəssam, rəsm sahəsində fəaliyyət göstərir. Bakı şəhərində, doğulub və böyüyüb. Kiçik yaşlarından sənətə maraq göstərib və 5 yaşından etibarən rəsm çəkməklə məşğul olmağa başlayıb. Təhsil: 2013-cü ildən Baku Modern International School məktəbində oxumağa başlayıb. 2024-cü ildə ADA Universitetinin Dizayn və Memarlıq Fakültəsinə qəbul olub. Yaradıcılıq və üslub: Səmiyə öz yaradıcılıq yoluna Azərbaycan Respublikasının Əməkdar rəssamı İnnə Kostinanın rəhbərliyi altında başlayıb. Hazırda artıq 7 ildir ki, Azərbaycan Rəssamlar İttifaqının üzvü Ayda Məmmədovanın şagirdidir. O, xüsusilə təbiət və natürmort əsərləri çəkməyi sevir. Onun sevimli rəssamlıq üslubu realizmdir, çünki bu üslub şəkilləri canlı detallar ilə əks etdirir. Sərgilər və Nailiyyətlər: Səmiyə Həsənova, Azərbaycanın İspaniyadakı səfirliyinin və "Dirçəliş" Gənclərin Sosial-Psixoloji Reabilitasiya Mərkəzinin birgə təşkilatçılığı ilə Madriddə keçirilən azərbaycanlı gənc rəssamların "Art of Cultural Diplomacy" adlı sərgisində iştirak edib. Həmçinin, o, Elm və Təhsil Nazirliyinin təşkil etdiyi "Yaşıl dünya naminə rəqəmsal incəsənət" rəsm müsabiqəsində də iştirak edib.