One Piece

Təqdim etdiyim əsər “One Piece” adlı animeyə həsr olunmuşdur. Anime – Yaponiyanın özünəməxsus animasiya üslubudur və əsasən yapon mədəniyyətinin xüsusiyyətlərini daşıyan, müxtəlif mövzularda təqdim edilən animasiya məhsullarını ifadə edir. Anime, yalnız uşaqlar üçün deyil, həm də böyüklər üçün hazırlanmışdır. Anime çox dərindən işlənmiş və bəzən həyatın məqamlarını, dərin fəlsəfi sualları və sosial məsələləri işıqlandıran hekayələr təqdim edir. Hekayələrdə dostluq, sevgi, məqsəd və özünütapma kimi mövzular tez-tez yer alır. Bu janr dünya üzrə çox populyarlaşmış və müxtəlif ölkələrdə də böyük izləyici kütlələri qazanmışdır. Bəs mən niyə bu rəsmi çəkdim? 2 ildən çoxdur ki, anime janrına böyük marağım var. Bu janrda artıq bir neçə filmlərə baxmışam, bunlardan ən sevdiklərim isə “Naruto” və “One Piece”dir. Rəsmini çəkdiyim “One Piece”– 1999-cu ildən bu yana yayımlanan məşhur bir yapon anime və manga seriyasıdır. Bu anime Luffi adlı gənc bir oğlanın hekayəsindən danışır. Luffi böyük bir xəzinəni tapmaq məqsədilə dənizlərə çıxır. Luffinin başına gələn macəralar, onu müxtəlif dostlarla bir araya gətirir və birlikdə böyük məqsədlərə doğru irəliləyirlər. Bu animedə əsl dostluğun nə qədər qiymətli olduğunu, həyatın bir macəra olduğunu və bu yolda qarşılaşdığımız çətinliklərin bizi necə gücləndirdiyini anladım. Bu janra olan marağım o qədər güclüdür ki, bir gün Yaponiyaya gedib, orada anime janrında şəkil çəkməyin incəliklərini öyrətmək, yaratmaq və öz hekayələrimi öz üslubumla təmsil etmək istəyirəm. Mənim üçün anime, sadəcə bir əyləncə deyil, həm də bir həyat fəlsəfəsi, yaradıcılıq və özünə inanmaq mövzusunda dərsdir. Animelərə baxdıqca anladım ki, çətinliklərə baxmayaraq öz məqsədin uğrunda yoluna davam etmək lazımdır. Anime dünyası mənə çox maraqlıdır və anime janrında əsərlər çəkməklə özümü daha da inkişaf etdirmək istəyirəm.