2021-ci il 13 Avqust tarixində saat 21:00-da əsrarəngiz rəssam Gəmər Ağazadənin əsərlərindən ibarət virtual sərgi açılmışdır.
Ağazadə Qəmər 1991-ci ildə Bakı şəhərində anadan olmuşdur. Uşaqlıq dövründən başlayaraq rəsm sənətinə böyük maraq göstərmiş və artıq gənclik illərindən professional fəaliyyətə başlamışdır. Yaradıcılığında daim fərqli janr və texnikalara müraciət etmişdir. Azərbaycanda və vətənimizin hüdudlarından kənarda təşkil olunmuş sərgilərdə fəal iştirak etmiş, geniş mövzu spektrini əhatə edən əsərləri daim diqqət mərkəzində olmuşdur: 2010-cu il Sofiya, Bolqarıstan, 2012-ci il Roma, İtaliya, 2013-cü il London, Birləşmiş Krallıq, 2014-cü il Budapeşt, Macarıstan, Bern, İsveçrə, 2015-ci il Praqa, Çex Respublikası. 2016-cı ilin noyabr ayında İtaliya səfirliyinin Bakı şəhərində təşkil etdiyi “FVTVRISMO ORA” sərgisində “My two natures” müasir mövzuda əsərini təqdim etmişdir. Elə həmin ildə, Polşanın Varşava şəhərində və eləcə də, Çex Respublikasının Praqa şəhərində Azərbaycanın gənc rəssamlarının sərgisində yeni yaradıcılıq nümunələri ilə iştirakı diqqəti cəlb edir. 2018-ci ildə Azərbaycan Xalq Cümhuriyyətinin 100 illik yubileyi münasibəti ilə iyul ayında Fransanın Paris, noyabr ayında BƏƏ-nin Dubay şəhərində təşkil edilmiş “Gənc Azərbaycan rəssamlarının sərgisində” böyük uğurla iştirak etmişdir. Son olaraq 2019-cu ildə Misirdə təşkil olunan “Azərbaycan Mədəniyyəti Günləri” çərçivəsində sərginin iştirakçısı olmuşdur. Hal-hazırda yağlı boya texnikası ilə əsasən portret janrı üzərində fəaliyyətinə davam edir.